Gi-salvage giputos og garbage bag
CEBU, Philippines — Usa ka wala mailhing lalaki nga gidudahang gi-salvage ug giputos og itom nga garbage bag ug gibilin diha sa may sapa sa Barangay Mainit, Dakbayan sa Naga niadtong Miyerkules sa hapon.
Sumala pa sa imbestigador sa maong kaso nga si PO3 Roly Getubig nga usa ka Henry Dumogho, residente sa maong dapit unang nakakita og usa ka dakong itom nga plastik nga nahimutang daplin sa sapa diin sag-oban unta niya og tubig.
Matud pa nga sa dihang gitangtang ni Dumogho ang usa ka plastik nga straw nga higot niini nigimaw ang abaga sa usa ka wa pa mailhing lalaki.
Sa pagsusi sa kapolisan aduna kini daghang mga samad dinunggaban sa ilok ug miburot na ang nawong niini sa wa pa masayring hinungdan.
Sumala pa ni Getubig nga ang biktima anaa sa pangidaron og 30, gibana-banang adunay gitas-ong 5'4 hangtud 5'5 ug nagsul-ob kini og sando nga color blue nga adunay stripes nga puti, binuwakang itom nga boxer shorts.
Hangtud karon wala pa masayod ang kapolisan kon kinsa ang maong tawo ug kon kinsa ang naghimo sa maong krimen. Girekomendar nila nga ipa- autopsy ang patay’ng lawas.
Samtang ang desk officer sa Naga City Police station nga si PO2 Crispin Amaquiton mitug-an sa Banat News nga wala pay mga tawong nangita og kabanay nga na-missing.
Pangagpas nila nga dili residente sa Dakbayan sa Naga ang biktima ug matud pa posibleng gipatay kini sa laing lugar ug dinha lang gilabay kay hilit ang maong lugar. (BANAT NEWS)
- Latest