Provincial Tourism Code aprobado na
CEBU, Philippines — Aprobado na sa Provincial Board ang Provincial Tourism Code sa Sugbo.
Gipaabot nga ang turismo sa probinsiya mas molambo pa human naaprobahan ang ordinansa nga nagpalig-on sa Provincial Tourism Council.
Matud ni Bise Gobernador Agnes Magpale, author sa ordinansa ug chairman sa committee on tourism sa PB, nga ang Tourism Code maoy tamdanan sa tanan kalihukan sa turismo sa probinsiya.
Tumong sab niini nga mahiusa ang mga lokal nga kagamhanan, nagkalain-laing departamento sa gobiyerno ug mga pribadong sektor sa pagpreserba ug pag-uswag sa turismo sa Sugbo. Lakip niini ang mga pangulo o representante sa Department of Tourism, Department of Trade and Industry, Department of Public Works and Highways, Department of Labor and Employment, Philippine National Police, Cebu Tourism Officers Association ug uban pang sakop sa tourism industry.
Ang Provincial Tourism Office butangan sab og mga kwalipikado nga mga empleyado.
Usa usab ang pag-institutionalized sa Suroy-Suroy Sugbo nga programa sa Kapitolyo aron maseguro nga permanente na kini nga programa sa Kapitolyo.
Nakigtambayayong ang buhatan sa bise gobernador sa mga hotel, resort ug uban pang ahensya sa Sugbo diin may kalambigitan sa kalihukan sa turismo. Gikatakdang magsugod ang implementasyon sa maong ordinansa 15 ka adlaw human kini giaprubahan. (BANAT NEWS)
- Latest
