Unom sikop sa drug bust
CEBU, Philippines — Gitanggong sa prisohan ang usa ka gwardya ug usa ka ginang human sa buy-bust operation sa Philippine Drug Enforcement Agency-7 sa Barangay C. Padilla ug dalan Borromeo, Barangay Pahina Central ning Dakbayan sa Sugbo.
Ang tigpamaba sa PDEA-7, Leia Albiar, miingon nga gidakop nila si Rosalita Monteador, 50, human napalitan nila og usa ka paketeng shabu ug nakuhaan og 20 ka gramos nga susamang druga.
Sunod nga gironda ang panimalay ni Domineciano Calunsag, 53, nga napalitan sab og shabu ug nakuhaan og unom ka mga paketeng shabu nga mokantidad og P150 mil.
Sa Dakbayan sa Danao nadakpan sa nagpatrolyang mga polis ang upat ka tawo sa Sitio Rotonda, Barangay Guinsay, Dakbayan sa Danao.
Si Senior Police Officer 1 Arnold Labine sa Danao Police Station miila sa mga nadakpan nga mao sila si Helen Marie Formentera, 23, Glenn Formentera, 31, James Barot, 27, ug Luis Gonzales Jr. human sila nasakmitan og upat ka gagmay nga pakete nga gituohang shabu ug drug paraphernalia.
Sa pikas bahin, nalipay ang director sa PDEA-7 Emerson Margate nga gibalik na ang PNP sa war on drugs tungod kay matud pa naglisod gyud sila kay kuwang sila og tawo.
Samtang si Cebu Archbishop Jose Palma mipasidaan nga sa pagbalik karon sa PNP, angay unta nilang ampingan ang kinabuhi ug di na masubli kadtong nangagi nga diin liboan ang napatay sa mga polis sa kampanya kontra drugas. (BANAT NEWS)
- Latest
