Ikaduhang suspek sa Rupinta-ambush gikiha
CEBU, Philippines — Gipaubos na sa inquest proceedings sa piskaliya kagahapon ang ikaduhang suspek sa pagpatay sa kapitan sa barangay Ermita Felicisimo “Imok” Rupinta.
Si Jordan Gera gibasahan sa iyang kaso nga murder ug attempted murder sama sa kasong giatubang sa laing suspek nga si Jimmy Largo nga unang nadakpan nga suspetsado sa pagbanhig patay ni Rupinta.
Sa sala ni Fiscal Liewellyn Bonghanoy sa provincial prosecutor gi-inquest kagahapon si Gera nga nagsuot og bullet proof vest ug Kevlar helmet alang sa iyang seguridad.
Pasado alas 11 sa buntag gahapon niabot si Gera kauban ang hepe sa RSOG nga si Supt. Reynaldo Magdaluyo.
Si Gera nipili nga adto sa korte tubagon ang duha ka kasong kriminal nga gipasaka batok kaniya.
Si Gera gidakop sa mga sakop sa RSOG niadtong Biyernes sa hapon sa balay sa Barangay Jugan lungsod sa Consolacion.
Matud ni Magdaluyo, aduna pay lima ka mga suspetsado nga ilang dakponon nga may kalambigitan sa pagbanhig-patay kang Rupinta didto sa barangay Tayud lungsod sa Liloan niadtong Nobiyembre 23.
Samtang gihangyo ni Chief Supt. Jose Mario Espino ang publiko ug sa pamilya ni Rupinta nga patas-an ang pasensya kun nganong hangtud karon wala pa nila ibutyag kinsa ang utok sa maong krimen.
Matud pa ni Espino, giampingan nila nga dili mabulilyaso ang ilang operasyon batok kanila.
Sumala pa ni Espino sama sa pagdakop nila kang Gera mahimo nilang dakpon ang nahibiling mga suspek bisan wala pay warrant of arrest tungod kay padayon man ang ilang hot pursuit operation batok sa tulo.
“Continuous pa ang pursuit operation para sa iba pang kasama and at the same time we are building evidences, witnesses and circumstantial evidences to really build airtight cases against them,” dugang pa sa maong direktor. (BANAT NEWS)
- Latest
