Mga bata manaygon sa sakyanan sa SRP

CEBU, Philippines — Nisiaw karong panahona ang mga bata nga manaygon sa mga sakyanan nga mag-agian sa South Road Properties (SRP) sa Dakbayan sa Talisay.

Makita kining mga bataa sa eskina sa Barangay Lawaan 1 ingon man sa eskina sa Barangay San Isidro.

Si Felipa Solana, pangulo sa City Social Welfare and Development, nagkanayon nga naabot na nila ang maong report maong siya niawhag sa mga barangay nga hingtungdan nga makig-alayon kanila aron mabadlong ug mahimoan kini og aksyon.

Matud ni Solana nga delikado kaayo sa mga bata tungod kay kusog managan ang mga sakyanan nga moagi sa SRP.

Gani siya nipadayag nga ila nang gisuwayan sa pag-rescue ang mga bata ug gipatawag ang mga ginikanan niini.

Iya sab giawhag ang mga motorista nga dili gyud hatagan og kwarta o bisan unsa ang mga bata nga manaygon sa lugar aron sila mapul-an sa pagpanaygon ug dili na mobalik.

Makit-an ang mga bata nga naa sa karsada bisan unsang orasa ilabi na sa kagabhion nga dili na init ang panahon. (BANAT NEWS)