Lima ka lungsod gihatagan og ambulansya

CEBU, Philippines — Lima ka mga lungsod ang gihatagan og kaugalingong bag-ong ambulansya gikan sa Kapitolyo aron ilang magamit panahon sa emerhensiya.

Tagsa ka ambulansya nga nagkantidad og P1.7 milyones ang kada usa, ang nadawat sa munisipyo sa Compostela, Badian, Boljoon, San Fernando ug Minglanilla atol sa turnover ceremony nga gipahigayon sa Kapitolyo.

Si Gov. Hilario Davide III kauban si Vice Gov. Agnes Magpale, First District Bokal Yolanda Daan, Second District Bokal Jose Mari Salvador ug Bokal Christopher Baricuatro sa Seventh District sa pagtunol sa maong mga ambulansiya. “We will try as much as we can nga mahatag namo ang inyong mga panginahanglan,” dugang ni Davide. Mapasalamaton si Mayor Lakambini Reluya, mayor sa San Fernando sa buhatan ni Davide nga usa sila sa nagahinan sa maong ambulansya diin matud niya nga niaging tuig pa nila kini gi-request unya wala gani sila nag-follow up apan naapil gihapon sila.

Ang lima ka ambulansiya ang ika-289 nga unit sa sakyanan nga gipanghatag sa Kapitolyo sukad niadtong 2013.

Ang 34 niini mga ambulansya, 52 kay mga mini-ambulance, 156 ka mga multicabs, 14 ka mga mini dump trucks, usa   ka Jinbie truck, 10 ka mini-vans, 10 ka meat vans, ug 12 ka mga motor. (BANAT NEWS)