Midagit sa ginang hanas

CEBU, Philippines — Mipahimangno si Konsehal Dave Tumulak, Deputy Mayor for Police Matters sa publiko ilabi na kadtong mga nanag-iya og pribadong sakyanan nga magmatngon kanunay.

Kini human sa nahitabong pagdagit ug pagtulis sa tulo ka mga lalaki sa 60 anyos nga ginang gikan sa usa ka mall sa Talamban ug gidala didto sa Moalboal.

 Ang konsehal miingon nga magbinantayon kanunay sa palibot ug kon mosakay na sa sakyanan mas maayo nga i-lock dayon kini aron dili dali nga masudlan og dautang tawo.

Giawhag sa konsehal ang publiko nga kun mabantayan ang maong sakyanan i-report gyud dayon kini sa labing duol nga police station.

Samtang gihulagway sa kapolisan nga organisadong grupo ang midagit ug mitulis kang Elizabeth Seniedo.

Sumala pa sa hepe sa Talamban Police Station nga si Senior Insp. Arieza Otida gikan nag-withdraw og kwarta sa bangko si Seniedo ug sa dihang miadto na kini sa parkinganan sa basement sa maong mall gitionan siya og pusil sa duha ka  mga lalaking nagtaptap sa ilang mga nawong.

Pugsanon siyang gipasulod sa iyang sakyanan ug gihigtan ang duha ka mga kamot ug gitaptapan ang iyang mga mata ug gidala kini sa mga gikatahapan.

Matud pa ni Otida, ang biktima mihulagway nga daw adunay kontak ang duha kay adunay gikaestorya ang usa  diha sa telepono nga maoy nigiya sa ilang agianan palayo sa mga polis nga nagpahigayon og checkpoint niadtong tungora.

Nagduda ang kapolisan nga propesyonal nga mga tulisan ang grupo. 

Matud pa ni Otida nakabantay usab ang biktima nga samtang nagbiyahe gisigehan kini og alam-alam sa usa sa mga gikatahapan.

"Sige kuno og ingon nga kalma lang kay gamay ra daw ilaha. The intention really was to rob her. Actually one of the suspect nangayo’g pasaylo kay manganakay ang asawa," sigun pa sa maong hepe.

Gipakanaog ang biktima sa Kanyuco, lungsod sa Moalboal ug gihigot kini ngadto sa usa ka kahoy dayon nisibat dala ang brown Fortuner model 2016 sa biktima nga adunay plate number nga AED 3357, mga alahas, cellphone ug kwarta nga P15 mil.

Ang maong hepe mibutyag nga ang biktima nakalingkawas gikan sa pagkahigot ug misakay og usa ka bus paingon sa police station sa Moalboal aron didto mosumbong sa kapolisan.

Luwas ra nga nakauli ang biktima apan matud pa sa hepe nga anaa gihapon ang gibating kahadlok sanglit nasayran na sa biktima nga aduna na diay naniid kaniya.

Nanghipos pa karon ang kapolisan og mga kopya sa mga CCTV footages gikan sa maong mall nga makatabang sa imbestigasyon. (BANAT NEWS)