JO sa Talisay makadawat og pinaskohan

CEBU, Philippines — Ang mga job order sa dakbayan sa Talisay nanghinaot nga unta makadawat sila og pinaskohan gikan sa kagamhanan sa siyudad.

Si Mayor Eduardo Gullas nipasalig nga andam sila nga mohatag og pahalipay apan aduna pa sila’y gipaabot nga memorandum circular gikan sa Department of Budget and Management (DBM).

Matud ni Gullas nga bisan pa og walay memorandum nga ipagawas, mopagawas gyud sila og pundo aron ipahalipay sa mga job order nga kawani. Ang dakbayan sa Talisay aduna kini 1,000 ka JO.

Ang city budget officer Edgar Mabunay mipadayag nga dili gyud  obligado ang siyudad nga mohatag og bunos sa JO tungod kay wala man kini gitugot sa balaod apan magdepende lang kini sa mayor.

Hinuon ang siyudad adunay pundo nga dili na kinahanglan pa nga mopalabang og supplemental budget. (BANAT NEWS)