Drainage project sa Bulacao-Tabunok gisugdan na

CEBU, Philippines — Ang problema sa baha nga moabot sa hawak sa tawo ang giladmon panahon sa kusog nga bunok sa uwan diha sa dalan Natalio Bacalso Avenue sa Barangay Bulacao, dakbayan sa Talisay ang mahatagan na og solusyon.

Kini human gisugdan na sa Department of Public Works and Highways (DPWH) pinangulohan ni Engineer Leslie Anthony Molina ang pag-ayo sa drainage sa maong dapit nga molahos ngadto sa Barangay Tabunok.

Moabot ngadto sa usa ka kilometro ug 600 metros ang sukod sa kinatibuk-ang drainage nga ilang himuon.

Matud ni Molina nga nalangan ang maong proyekto tungod kay ilaha pa kining gidesisyonan kun asa dapita ang gawsanan sa tubig sa kanal.

Gibutyag ni Molina nga anha sa sapa sa barangay Bulacao nila palutson ang tubig sa kanal  nga ilang himuon sa Bulacao ug sa kanal nga ilang himuon sa Tabunok anha palutson nila sa sapa sa Mananga ang tubig niini.

Ang Adlawan Construction  kinsa maoy contractor sa proyekto misaad nga mahuman ang nahisgutang proyekto sulod sa unom ngadto sa walo ka buwan.

Si Kapitan Raul Cabañero sa Bulacao mihangyo sa mga motorista nga mosabot unta kong malangan sila sa ilang biyahe tungod sa construction sa proyekto. (BANAT NEWS)