P32.87M nga kabtangan ibaligya sa PDIC

CEBU, Philippines — Mikabat ngadto sa P32.87 milyones ang kantidad sa mga kabtangan nga ipaubos sa public bidding sa Philippine Deposit Insurance Corporation (PDIC).

Ang maong mga kabtangan nga gilangkuban sa 52 ka agricultural, commercial, residential lots ug lima ka sakyanan nakuha kini gikan sa mga nasirado na nga mga bangko.

Ang maong mga kabtangan nahimutang sa mga probinsiya sa  Abra, Aklan, Antique, Bohol, Capiz, Cebu, Guimaras, Iloilo, Leyte, Negros Occidental, Negros Oriental, Southern Leyte, ug Surigao del Sur.

Si Vice President for Corporate Affair’s Group Jose Villaret mibutyag nga ang maong mga kabtangan “as-is, where- is basis”.

 Ang public bidding ngadto ipahigayon sa Bangko Sentral ng Pilipinas (BSP), Cebu Regional Office ug magsugod kini sa alas 2:00 sa hapon karong Disyembre 8, 2017.

Magsugod og dawat ang PDIC sa mga bid sa alas 9:00 sa buntag hangtud alas 2:00 sa hapon sa maong adlaw. Kinahanglan usab nga magdala og ID ug makaparehistro ang mga prospective buyers sa dili pa mag-ala una sa hapon.

Ang prospective buyer nga mosumitir sa ilang bid kinahanglang maglakip kini og manager’s check sa 10 porsyento nga bond sa kantidad sa kabtangan nga apilan nila sa bidding.

Ang mga bidder nga wala makadaog sa bidding mabalik ngadto kanila ang ilang 10 porsyento nga gisumitir ug ang mga nakadaog hatagan og 15 ka adlaw nga makabayad sa ilang balanse sa bidding.

Ang mga presyo sa mga kabtangan ug ang mga dokumento nga gikinahanglan sa bidding makita ug ma-download ra nga libre diha sa website sa PDIC.

Ang kwarta nga makuha sa maong bidding mabalik  ngadto sa bangko aron mahatag kini sa mga uninsured depositors. (BANAT NEWS)