Wanted sa kasong pagpatay sikop

CEBU, Philippines — Nasikop sa kapolisan ang usa sa top 2 most wanted sa kasong murder diha sa Sitio Suong, Barangay Mactan, dakbayan sa Lapu-Lapu kagahapon sa alas 2:00 sa hapon.

Ang mga sakop sa Criminal Investigation and Detection Group Region-7 ang mi-serve sa warrant of arrest batok kang Oscarlito Golbin Sr., hingkod ang panuigon, lumad nga taga lungsod sa Tabuelan.

Ang tigpamaba sa CIDG Senior Inspector Edwin Lacostales mibutyag nga niadto pang Septiyembre, 2013 nakapatay si Golbin ug human sa maong insidente nagtago-tago kini didto sa lungsod sa Tabuelan.

Ug niadtong miaging buwan nabantayan sa CIDG-7 nga mibalik sa dakbayan sa Lapu-Lapu si Golbin hinungdan nga gi-serve dayon nila ang warrant of arrest niini nga giluwatan ni Regional Trial Court (RTC) Judge Anna Marie Militante sa Branch 23 sa Lapu-Lapu City niadto pang Abril 21, 2013. Ang mga sakop sa CIDG mipahigayon una kini og pipila ka semana nga pagpaniid pagpiho nga si Golbin naa diha sa lugar.

Si Golbin kinsa usa ka drayber sa traysikad miangkon sa kalapasan nga iyahang nahimo diin matud niya nga gidunggab niya ang tag-iya sa yuta nga ilang giabangan tungod kay naglagot siya nga sayo kaayo kining naningil.

Si Lacostales sa iyang bahin, nagkanayon nga mopahigayon pa sila og lawom nga imbestigasyon pagsuta kong wala na bay laing kaso si Golbin.

Karong adlawa gikatakdang ipresentar ngadto sa korte si Golbin. (BANAT NEWS)