Inahan nga milabay sa anak gipasakaan og kaso

CEBU, Philippines — Gipasakaan gyud kagahapon sa buntag og kasong infanticide diha sa piskaliya sa dakbayan sa Talisay ang usa ka 18-anyos nga inahan kinsa milabay sa iyang bag-ong nahimugso nga anak nga lalake.

Nagpakiluoy si Geraldine Castro kang PO1 Janeth Marquez sa Talisay City Police Station Women and Children’s Protection Desk nga unta dili na lang siya pasakaan og kaso sa iyang gibuhat nga paglabay sa iyang premature nga anak diha sa sapa sa Mananga, Barangay Tabunok, dakbayan sa Talisay niadtong miaging hapon.

Si Castro nangangkon nga wala gyud niya tuyoa ang pagpatay sa iyang anak ug nataranta lang siya niadtong higayona.

Apan si Marquez nagkanayon nga angayang sa korte na lang motubag si Castro sa mga pasangil batok kaniya kun tinud-anay gyud nga wala siya’y intensiyon sa paglabay ug pagpatay sa iyang anak.

Ang inahan ni Castro nga si Anselma mipadayag sa iyang kaguol sa kamatayon sa iyang apo ug sa pagkapriso sa iyang anak. Si Anselma nagkanayon nga wala gyud siya masayod nga mabdos diay ang iyang anak nga si Castro tungod kay gamay raman kini og tiyan.

Si Castro nagtungha kini sa pampublikong tunghaan apan giingong dili kini seryoso sa iyang pag-eskwela tungod kay magsige lang kini og palta sa klase. Si Castro nagpakiluoy nga kun tagaan siya og higayon modagkot siya og kandila sa lugar nga gilubngan sa iyang anak ug mangayo og pasaylo sa iyang gibuhat.

Kagahapon sa buntag gidala ni Marquez si Castro sa piskaliya ug giduso ang kasong infanticide.

Sa nasayran, si Castro ang giingong nitubag sa sugo sa iyang lawas diha sulod sa kumon nga pansayan.

Apan ang nisunod niya sa maong pansayan natingala human siya makakita og inunlan ug nahibaw-an nga iyaha kadto kang Castro.

Ug nasuta usab nila nga ang bata gilabay diha sa sapa hinungdan sa pagkasikop ni Castro. (BANAT NEWS)