Truck operators paayuhon sa karsada

CEBU, Philippines — Gipatawag ni Talisay City Mayor Eduardo Gullas ang mga tag-iya og dagkong sakyanan nga gitumbok nga nakaguba sa mga karsada sa siyudad.

Walo ka tag-iya sa dagkong truck nga taga Talisay ang nitambong ug gihangyo nga aduna gyud sila’y mabuhat sa karsada nga pwerte nang gubaa.

Hinoon nipasalig ang grupo nga mobutang og anapog sa mga karsada nga nangaguba.

“Kining ato band aid pa ni ha kay kawang man lang kay madaut man lang gihapon tungod sa panahon nga ting-uwan pa man,” matud ni Gullas.

Hayan sa Enero usban sa pag-aspalto ug pagsemento ang karsada nga naguba.

Ang pag-abuno og anapog sa mga libaong nga karsada himoon karong adlawa base sa pasalig sa mga tag-iya sa dagkong truck.

Ang mga naguba nga karsada anaa sa Dumlog, Poblacion, Cansojong, Tangke ug Pooc.

Sunod hangyo ni Gullas mao nga kung maguba gihapon sa mga truck ang ayuhon nga karsada, sila na ang mga tag-iya niini papaayuhon.

Dugang ni Gullas nga dili niya kinaiya nga manghulga maong iyang gihimo mao lang ang paghangyo. (BANAT NEWS)