Kawot sa underpass project peligro sa sakyanan

CEBU, Philippines — Nagtagbo si Konsehal Dave Tumulak, chairman sa committee on public order and safety, ug taga Department of Public Works and Highways ug Metropolitan Cebu Water District.

Kini aron ipaabot ang concern niini mahitungod sa grabeng traffic nga nasinati sa Natalio Bacalso Avenue ug F. Llamas Street nunot sa giugmad nga underpass project.

Gihangyo sa konsehal ang DPWH nga kung mahimo buksan ang lane gikan sa downtown area paingon sa south sulod sa pila ka oras aron mamenusan ang trapik.

Apan sigun ni Engr. Josue Raoul Miole, project inspector sa DPWH-7, nga dili feasible ang plano gumikan kay risgo kini sa mga motorista nga moagi sa maong lane.

“Kanang aspalto, magkawot tag one-meter kapin naay paagian nato nga sakyanan bitaw sa kilid unya naay nag-kawot one-meter diri sa tunga unya naay sakyanan paagian kay mao may iyang gusto nga paagian mao nay peligro kay tungod sa kaapiki ang jeep delikado niya og maligas ba unya kanang one-meter sakit na kay na matagak simbako unya naay workers nagtrabaho mao nay delikado so mao nay among gipangitaan og paagi nga kung magpaagi man ta diha kanang matabunan na,” pasabot ni Miole.

Hinoon gipasalig ni Miole nga paspasan nila ang ilang trabaho aron makatabang nga maminusan ang kahuot sa dagan sa trapiko sa dapit.

Si Tumulak niingon nga dili 24-oras ang trabaho sa kontraktor sa maong proyekto diin ang mga trabahante magsugod sa alas 7 sa buntag hangtud na sa alas 5 sa hapon.

Apan gipasabot ni Miole nga usa sa rason nganong dili pa sila maka-full blast tungod sa linya sa MCWD nga maapektuhan sa proyekto.

Sa meeting nila kagahapon, ang MCWD nihangyo nga sirad-an nila ang dalan sa Caimito karong adlaw’ng Sabado sulod sa duha ka oras aron atimanon ang ilahang linya. (BANAT NEWS)