Palma: Respetuhon ang kinabuhi

CEBU, Philippines — Si Archbishop Jose Palma sa Arcdiocese of Cebu nagkanayon kinahanglan gyud nga pangusgan ang kampanya kontra ilegal nga drugas nga gihulagway niyang inahan sa tanang kadaut. Apan nanghinaut siya nga sa tinguha karon ni Presidente Rodrigo Duterte pagpabalik sa kapulisan sa kampanya batok ilegal nga drugas sa ikaduhang higayon, magmatngon kun unsay makaayo sa nasud.

Sumala pa ni Palma, tanang tarong nga tawo di gyud gusto niining ilegal nga drugas hinungdan bisan kinsa pa nga ahensya ang mokupot sa operasyon paggukod niini , Philippine Drug Enforcement Agency man o kapulisan,  kinahanglan sundon lang nila ang ilang tahas nga mao ang pagkab-ot sa kahapsay, kalinaw ug ang pagpreserbar sa kinabuhi sa tawo.

Dugang pa sa Arsobispo, maoy iyang panghinaut nga dili matintal ang mga law enforcers sa pagbutang sa balaod diha sa ilang mga kamot.

Tungod kay ang tanang katawhan usa ra ka dakong banay, bisan unsa pa sila ka masalaypon sa balaod ug adunay katungod nga magpakabuhi ug manubag sa ilang nahimong kasaypanan.

Mapasalamaton si Palma, tungod kay ang Archdiocese of Cebu, adunay mga programa nga nagtabang sa mga kanhi drug dependents nga mao ang Surrender to God Program sa Love Of God Community ni Fe Barino.

Karong Sabado,  mo-graduate ang laing 45 ka tawo  nga mao ang ika 11 nga batch sa mga kanhi drug addicts nga nagbag-o.

Samtang si Konsehal Dave Tumulak, Deputy Mayor for Police Matters miingon nga sukad mihunong ang kapulisan sa operasyon batok ilegal nga drugas  migara sab ang mga ilegalista ilabi na ang giingong distribusyon sa drugas sa kabarangayan.

Nagtuo siya nga tungod kini sa kagamay lang sa mga tawo sa Philippine Drug Enforcement Agency (PDEA)-7. Apan kay gipanglantawan nga kun mabalik na unya ang kapulisan gipaabot niyang daghang operasyon nga mahitabo.

Sa laing bahin, uyon si Talisay City Mayor Eduardo Gullas nga balik na sa war on drugs ang kapulisan kini bisan pa man daghang mga mayor sa nasud ang dili gustong moapil ang mga polis sa operasyon tungod sa kadaghan sa ilang gihimong isyu. Apan sa iyang bahin uyon siya tungod kay nisalig man siya sa iyang kapulisan nga pinanguluhan ni Supt. Jason Villamater.

Sa nasayran, nigawas ang report nga aduna’y pag-rollback sa presyo sa shabu human gilibkas ang gahom sa kapulisan nga moapil sa pag-operate batok sa ilegal nga drugas.

Gikaingon nga gikan sa 380 ang usa ka deck hayan nibalik kini sa orihinal nga presyo nga tag P200  na lang matag deck.

Apan karon gituohang mobalik kini og kamahal kun mobalik na ang kapolisan.

Samtang P207 mil nga balor sa gidudahang shabu ang nasakmit gikan sa 11 ka mga tawong nadakpan  sa managlahing operasyon sa PDEA-7. (BANAT NEWS)