Motor vs truck duha patay sa Toledo

CEBU, Philippines — Tulo ka tawo ang patay sa duha ka managlahing panagbangga nga gikalambigitan sa motorsiklo.

Patay ang duha ka mga lalaki human nga nabanggaan ang gisakyan nila nga motorsiklo sa usa ka delivery truck sa national highway sa Barangay Poog, Dakbayan sa Toledo niadtong Miyerkules sa gabii.

Giila sa Toledo City PNP Traffic Section ang mga nakalas nga sila si Dominador Rabadon Jr., 36, nagmaneho sa motorsiklo ug ang angkas nga si Narvin Bacalso Denazi, 36 , pulos taga Tabunoc Dakbayan sa Talisay.

Sa imbestigasyon nga gihimo ni Senior Police Officer 4 Lorenzo Mahilum, Traffic Section head sa Toledo nasuta nga gikan sa trabaho sa lungsod sa Balamban ang mga biktima ug paingon na nga mopauli sa Talisay.

Gikasugat sa ilang motorsiklo ang delivery truck nga gikan sa dakbayan sa Mandaue ug paingon sa Toledo.

Giingong nawad-an og kontrol ang drayber sa truck nga si Gerald Cardinas Sator nga taga Liboron, Carcar ug nabanggaan ang duha hinungdan nga nalagpot kini ug nangalabay ang mga sakay. Maayo nga pagkapisa ug dili na mahitsura ang motorsiklo.

Gidali pagtabang ang mga biktima ug gidala sa Carmen Copper Corporation Hospital. Apan gideklarar sa mga doktor nga patay na sila.

Samtang nalahos og kabangga ang truck sa dako nga poste hinungdan nga nakaangkon og  pangus ang ubang sakay niini nga si Brandelle Eneheo nga taga Gun-ob dakbayan sa Lapu-Lapu. Gikustodiya na sa kapolisan ang drayber sa trak.

Sa laing bahin, patay usab ang usa ka 30 anyos nga mamaligyaay og saging human siya nadasmagan sa usa ka sundalo nga nagdrayb og motor diha sa Sitio Tabay, Barangay Makaas, lungsod sa Catmon niadtong Miyerkules sa hapon.

Sumala pa sa imbestigador sa maong kaso nga si SPO1 Ben Navales nga patay na dihang nadangat sa tambalanan ang biktimang si Marilyn Romero, residente sa maong dapit.

Nasuta sa imbestigasyon nga nagdala pa sa iyang baligyang saging ang biktima nga naglakaw sa kalsada ug paglabang niini nadasmagan kini ni Private Kevin Cutor Sumosa, 25, nga usa ka sundalong lumad nga taga Bohol apan nadestino sa Medellin.

"Naa may nakakita kuno nga nag-atras-abante ning biktima. Mura nag nagduha-duha ba," si Navales miingon.

Naangol usab si Sumosa sa maong aksidente human nalabay kini og duha ka metros gikan sa iyang motor. Dali nga gidala sa tambalanan si Sumosa apan anaa na kini sa luwas nga kahimtang. (BANAT NEWS)