Banat ( Leaderboard Top ), pagematch: 1, sectionmatch: 1

Unom angol sa pabrika sa pabuto

Aksidente nga ni-spark ang iyang bawang nga gisudlan og pulbora, hangtod nga niabot ngadto sa iyang mga nahuman na og himo dili layo sa iyang nahimutangan. Philstar.com/File

CEBU, Philippines — Unom ka mga tawo ang naangol diin tulo niini ang mga bata ug naa karon sa tambalanan sa Dakbayan sa Sugbo human sila nakaangkon og mga paso sa kalawasan sa dihang mibusikad ang buhatanan og pabuto sa may Sitio Judas Belt, Barangay Babag Dakbayan sa Lapu-Lapu niadtong hapon adlaw nga Miyerkules.

Ang payag-payag nga himoanan og pabuto gipanag-iya ni Argentina Amistad, kinsa nakaangkon usab og paso, samtang grabeng pagkalapnos sa panit nila ni Marcia Amistad, 8,  ug Isah Jane Andal, 14.

Nakaangkon usab og pagkapaso ang padre de pamilya nga si Jonathan Amistad ug sila si Andrew Laurel, 14 anyos ug Angelou Casul, 18 anyos.

Matud pa ni Police Officer 2 Raul Ruiz, Investigator sa Station 3 Lapu-Lapu City Police Office base sa imbestigasyon naghimo og pabuto si Jonathan sa may Satellite Firecracker Factory sa maong lugar. Aksidente nga ni-spark ang iyang bawang nga gisudlan og pulbora, hangtod nga niabot ngadto sa iyang mga nahuman na og himo dili layo sa iyang nahimutangan.

Dugang pa ni Ruiz, disgrasya gayud ang pag- spark sa pulbura nga hinungdan nga nangbuto ang mga nahuman na nga pabuto ug niangol sa mga tawo nga anaa sa lugar.

Ang mga biktima una nga gidala sa tambalanan sa dakbayan apan gibalhin sa Vicente Sotto Memorial Medical Center alang sa dugang pa nga pag-atiman.

Matud pa ni Senior Supt. Rommel Cabagnot, Director sa Lapu-Lapu City Police Office, walay papeles si Amistad ug wala usab pundohanan og tubig ug walay no smoking signage nga gipahimutang sa maong dapit. Dugang pa ni Cabagnot, gukdon nila ang mga naghimo og pabuto nga walay permiso tungod kay delikado kini sa katawhan. Ang Regional Director sa Bureau of Fire-7 Senior Supt. Samuel Tadeo, nimando na karon sa iyang ginsakopan sa pagpahigayon og imbestigasyon sa maong sunog.

Usa ka libo ka pesos lang ang danyos niini tungod kay payag-payag lang nga himoanan og pabuto nga ginama sa light materials ang nasunog apan niangol og unom ka tawo.

Sumala pa ni Tadeo, nimando na siya karon sa tanan niyang mga fire marshal sa pagpahigayon og inspection tibuok rehiyon 7 aron kalikayan ang ilegal nga pagbaligya ug paghimo og pabuto. Si Senior Fire Officer 2  Climaco Salisid sa Lapu-Lapu City Fire District nga nahinabi sa Banat News miingon nga layo sa kabalayan ang maong payag. (BANAT NEWS)

  • Follow Us: