Fire Olympics gisugdan kagahapon
CEBU, Philippines — Gisugdan kagahapon sa buntag ang duha ka adlaw nga Fire Olympics sa Bureau of Fire Protection (BFP)-7 diin gipangulohan kini sa ilang direktor nga si Senior Superintendent Samuel Tadeo.
Sa maong kalihukan upat ka duwa ang gipahigayon nga gilangkuban sa Busted Hose and Church Up the Ladder, Rescue Relay Event, Hose Unrolling/Rolling Event ug Surprise Event.
Matud ni Tadeo nga tumong sa mao nilang kalihukan mao ang pagdeterminar sa katakos sa ilang personnel ug pagpalambo pa sa ilang mga kahibalo may kalabutan sa ilang trabaho nga giatubang matag adlaw.
Ang kasamtangan nga defending champion ang Bohol, ug maoy ilang tinguha nga mahimong kampiyon ang Rehiyon-7 sa umaabot nga national nga competition.
Sumala pa ni Tadeo, walay premyo ang maong kalihukan apan adunay madawat nga recognition ang tanang mga niapil sa Fire Olympics.
Ang mga sakop sa kabomberohan sa Bohol, Cebu, Negros ug Siquijor ang nipakita sa ilang mga abilidad.
Gitug-an ni Tadeo, gawas sa ilang Fire Olympics kapin sa 50 usab ka inspectors sa Rehiyon-7 ang gipaubos sa Familiarization of Drug Paraphernalia and Equipment and Enhancement on Updated Fire Protection, aron makatabang kini sila sa higayon sa ilang pag-inspeksiyon kong aduna bay mga establisamento nga gigamit alang sa ilegal nga kalihukan. (BANAT NEWS)
- Latest