Kapolisan wa niundang batok drugas

CEBU, Philippines — Giputlan man og gahum nga manakop og mga durugista ang kapolisan apan wala maputol ang ilang monitoring.

Kini ang hinungdan nga nibutyag si Police Regional Office-7 Director, Chief Supt. Jose Mario Espino, nga dili sila maglisud kun ibalik kanila ang kampanya.

"Kahit nawala yung PNP sa campaign against illegal drugs, nandyan pa rin kami nagmamanman. Pag kami binalik, huhulihin namin kayong lahat," hulga ni Espino ngadto sa mga durugista kinsa hangtud karon wala pa niundang og payuhot og ilegal nga drugas.

Kini human nihisgut si Presidente Rodrigo Duterte nga dako ang purohan nga ipabalik ang kapolisan sa pagpakigbatok sa drugas gumikan kay dili maatiman sa Philippine Drug Enforcement Agency ang maong kampanya.

Si Espino niingon nga nagmalampuson sa pagpaubos sa supply sa drugas ang kaniadtong Oplan Double Barrel sa kapolisan ug matud pa nga kun ibalik na sab sila, moabag sab sila sa drug rehabilitation treatment ug drug education. (BANAT NEWS)