Diamante nakakuha og TRO
CEBU, Philippines — Nakakuha og temporary restraining order si Tuburan Mayor Democrito Diamante ngadto sa Commission on Elections (COMELEC) Second Division aron pugngan ang implementasyon sa kamandoan sa korte didto sa Toledo City nga palingkoron isip mayor sa Tuburan si Daphne Lagon.
“The Commission (Second Division) hereby issues a temporary restraining order, effective immediately, and for a period of sixty (60) days, enjoining Public Respondent Hon. Hermes B. Montero, Presiding Judge, Branch 59, Regional Trial Court Seventh Judicial Region, Toledo City, Province of Cebu and all person under his direct supervision, to cease and desist from enforcing/implementing or continuing to enforce the implement order dated October 25, 2017,” pagbasa sa kamandoan sa Comelec penitsahan Nobyembre 17, 2017.
Ang gipasabot sa kamandoan mao ang gipangayong pagtugot ni Lagon diha sa korte sa Toledo nga Motion for Execution Pending Appeal aron siya makalingkod.
Si Lagon nga kontra ni Diamante niadtong miaging piniliay mao ang gideklarar nga “duly elected Mayor” sa Tuburan, base sa desisyon ni Presiding Judge Montero sa RTC Toledo niadtong bulan sa Oktubre human sa manual recount sa 11 ka presinto ug nigawas nga labaw si Lagon og 93 ka botos kang Diamante sa May 2016 election.
Tungod niini si Diamante miduso og petition for certiorari and prohibition (with extremely urgent prayer for the issuance of a writ of preliminary injunction and/or temporary restraining order, status quo ante order and/or injunction) ngadto sa Comelec, kun diin ang Commission mi-issue usab og TRO.
Si Atty. Edgar Gica ang abogado ni Diamante mihulagway nga “binuang ang desisyon” sa korte kay wala kini magbase sa ebidensya ug wa mosubay sa balaod nga gipanday sa Comelec.
Si Diamante ug Lagon, pareho karong sakop sa PDP-Laban. Si Diamante nanumpa kini didto sa Pampanga samtang si Lagon niapil sa mass oath taking sa PDP-Laban niadtong Biyernes diha sa Plaza Independencia.
Si Diamante mao ang kasamtangang Presidente sa Liga sa mga Mayor dinhi sa probinsya sa Sugbo. (BANAT NEWS)
- Latest
