Nagpabakuna kontra dengue gamay ra
CEBU, Philippines — Wala makakuha sa target nga 14 mil ka bata ang mabakunahan sa dengue vaccine ang City Health Office sa Siyudad sa Talisay.
Si Dr. Lino Alanzado, pangu sa City Health Office nibutyag nga niabot lang sa singko mil ka bata nga nagpangidaron og 9 ngadto sa 14 anyos ang ilang nabakunahan.
Matud pa ni Alanzado nga kinahanglan nga kuyogan gyud sa mga ginikanan ang ilang mga bata nga magpabakuna.
Gawas pa niini ang lagda sa ilang pagbakuna nga kinahanglan nga nagtungha sa pampublikong tunghaan ang mga bata.
Siya niingon nga ang nakanindot wala misaka ang ilang kaso sa dengue sa siyudad. Iyang pagtuo nga niepekto gyud ang ilang task force dengue.
Si Alanzado nibutyag nga ilang i-uli ngadto sa Kapitolyo ang mga bakuna nga wala magamit aron mapuslan pa sa uban.
Ang syudad sa Talisay pabilin gihapon nga ikaupat sa pinakadaghang kaso sa dengue sa tibuok lalawigan ug ikaduha nga adunay namatay. (BANAT NEWS)
- Latest
