Taga hospital miduol sa PWC

CEBU, Philippines — Midangop ngadto sa Provincial Women’s Commission ang hepe sa Balamban Provincial Hospital kabahin kini sa giingong pagpang-harass sa pasyente ngadto sa usa nila ka nurse.

Si Dr. Olivia Dandan, chief of hospital sa Balamban Provincial Hospital nagkanayon nga mopaluyo kanila ang PWC sanglit aduna may pisikal nga harassment nga nahitabo sa ilang nurse.

Karong adlawa, gikatakdang makigtigom ang pangulo sa Provincial Health Office (PHO) Dr. Rene Catan ngadto nilang Dandan kabahin sa maong insidente.  Si Dandan nisumiter kini ngadto sa PHO og legal office sa Kapitolyo sa mga incident report kabahin sa nahitabo kun diin mireklamo ang pasyente ngadto sa ilang nurse ug nahitabo ang giingong pagyawyaw ug physical harassment ngadto sa empleyado.

 “At our end, okay ra mi kasab-an, kay atong ingnon, public servant, that’s okay but ang ato lang wala unta tay physical, mao ra gyud na ang gisakitan sa atong buot,” matod ni Dandan.

Si Dandan nagkanayon nga ang nurse nga giyawyawan sa magtiayon nga Quiamco dili mao ang nagtaod sa dextrose kun dili ang nursing attendant – apan base sa ilang pakisusi naatiman man kini sa nursing attendant ang reklamo sa pasyente.

Si Dandan mibutyag nga hangtod karon wala pa siya nakadawat og formal complaint gikan sa magtiayon kabahin sa reklamo niini niadtong higayona. (BANAT NEWS)