Shabu price ‘rollback’ sa Talisay
CEBU, Philippines — Aduna’y pag-rollback o pagkunhod sa presyo sa ilegal nga drugas nga shabu sa dakbayan sa Talisay sumala sa pipila ka mga manggamitay og shabu diha sa maong siyudad. Gani usa ka polis nitug-an sa Banat News nga nisiaw na sab pagbalik ang mga player sa ilegal nga drugas human nahunong ang kapolisan paghimo og operasyon batok sa ginadiling drugas.
Matud pa sa maong polis, nibalik sa tag P200 matag pakete ang shabu karon kumpara kaniadto nga P380.
Una niini, si Kapitan Bernard Balorio sa Barangay Pooc nipadayag nga nimenus ang shabu sa ilang lugar bisan pa man nahunong ang mga polis sa pagdakop sa mga tawo nga nalambigit sa ilegal nga drugas.
Apan matud pa niya ilang nabantayan nga nikusog hinuon sa ilang lugar mao ang marijuana kay menus ang presyo.
Si Supt. Jason Villamater, pangu sa kapulisan sa Siyudad sa Talisay nibutyag nga iya nang gimandoan ang iyang mga sakop sa pagsusi sa report nga nikusog ang marijuana. Kini samtang ilaha pang gipaabot ang opisyal nga kamandoan gikan sa kaulohan mahitungod sa mando ni Presidente Rodrigo Duterte nga pabalikon na ang PNP sa kampanya batok ilegal nga drugas. (BANAT NEWS)
- Latest
