P11M Agri-products gisakmit
Si BOC Commissioner Isidro Lapeña kauban ang mga opisyales sa BOC-Cebu gipaablihan ang duha sa lima ka mga container vans nga ang sulod mga mansanas, carrots ug patatas. Philstar.com/File
CEBU, Philippines — Gibanabanang P11 Milyones nga agri-products ang gisakmit sa mga operatiba sa Bureau of Customs –Cebu pinangulohan mismo ni BOC Commissioner Isidro Lapeña kinsa mianhi sa Sugbo kagahapon.
Si Lapeña kauban ang mga opisyales sa BOC-Cebu gipaablihan ang duha sa lima ka mga container vans nga ang sulod mga mansanas, carrots ug patatas.
Apan base sa papeles sa maong mga kargamento, kining tanan gideklarar lamang nga mga mansanas. Subay sa balaod, walay buhis ug uban pang balayrunon ang tag-iya niini.
"Ang apples kasi walang babayarang taxes ‘yan, but agricultural products such as potatoes and carrots may taxes and duties. Kaya the consignee misdeclared it as apples para wala silang babayarang buhis sa gobiyerno," matud pang Lapeña sa interbyu kaniya sa mga sakop sa media.
Si BOC-Cebu officer-in-charge Wivina Pumatong miingon nga bisan og aduna pay permit gikan sa Bureau of Plant Industry embarguhon gihapon kini sa gobiyerno kay gigamit kini aron ipalusot ang mga carrots ug patatas nga way mga import permits.
Gimando ni Lapeña ang pag-imbestigar sa consignee nga WSTAN and Company Inc. nga nagbase sa G/F Champ Bldg., Anda Circle, Bonifacio Drive, barangay 650, zone 086, Port Area sa kaulohan.
Sumala pa nga ang broker sa maong shipment mao si Johnro Robles nga adunay address nga 3rd Lot, Nazarette, Buhisan, Cebu City.
Matud pang Pumatong ang shipment gikan sa China ug naabot dinhi sa Sugbo sa kataposang bahin sa bulan sa Oktubre. Ang mga gisakmit nga agri-products isubasta dayon tungod kay malata man kini.
"This will be a warning to them (smugglers) that we will catch up with them eventually. All ports of the bureau will not be a place where they can do their illegal acts at the expense of the government," matud pang Lapeña. (BANAT NEWS)
- Latest
