Natanggong sa luna gi-rescue
CEBU, Philippines — Duha ka bata ug napulo ka empleyado sa Spider Taxi ang gi-rescue sa taga City Social Welfare and Development (CSWD) ug sa kapulisan sa dakbayan sa Talisay human sila nangatanggong sa luna nga ilang gi-okupahan didto sa Sitio Oregano, Barangay Lawaan 2, dakbayan sa Talisay. Si Sandy Aranas, security adviser sa Spider Taxi nagkanayon nga nidangop sila sa kapulisan human ang caretaker sa garahian gusto nang mobiya sa lugar kay gikoral na kini sa mga tawo sa usa ka Daniel Go, kinsa niangkon sa lima ka ektarya nga luna atbang sa Talisay City Hall.
Matud pa niya nga adunay bata nga nalakip sa natanggong gumikan kay diha man nagpuyo ang caretaker. Gumikan niini ilang gipakig-alayon ang CSWD aron ma-rescue ang mga tawo nga natanggong.
Apil sa mga natanggong ang 4 anyos ug usa ka tuig nga bata hasta ang ilang mga binuhi.
Si Angel Tamban, asawa sa caretaker nagkanayon nga duha ka semana na silang natanggong sa garahian ug lisod kaayo ang ilang kahimtang kay hatdan ra sila og pagkaon gikan sa gawas.
Si Johndry Pajuay, field supervisor sa Spider Taxi nisaysay nga wala sila mamiya kay maoy mando sa ilang labaw, apan wala na gyud sila makaagwanta sa ilang sitwasyon maong nagpatabang sila sa mga otoridad.
Samtang si Ramil Gapol, caretaker sa luna ni Daniel Go niingon nga gipakoral sa ilang amo ang luna apan siya miklaro nga ilang giabisohan ang mga tawo sa sulod nga mobiya na apan wala sila mopatuo.
Si Fe Bacaltos sa CSWD sa dakbayan sa Talisay niingon nga gi-rescue lang gyud nila ang mga tawo lakip ang mga bata. Si PO1 Janet Marquez, sa Women’s and Children Desk sa Talisay City Police nibutyag nga ang ila lang mao ang pag-asistar sa CSWD ug paghatag og kalinaw sa gihimo nga pag rescue. (BANAT NEWS)
- Latest
