Duha nagpinusilay parehong naangol

CEBU, Philippines — Nalandig sa tambalanan ang duha ka mga lalaki human nagpinusilay sa Climaco Extension sa Barangay Poblacion dakbayan sa Toledo niadtong Lunes sa gabii. Sila si Ronnie Suralta Mahinay, 53, ug Adonis Libre Amigable, 42, parehong nalandig sa tambalanan human sa ilang pinusilay.

Matud ni Police Officer 3 Aldwin Pepito daan nang adunay bikil ang duha ug naugkat pagbalik dihang nagkatagbo nianang orasa.

Parehong armado  og .9mm nga kalibre sa armas ang duha ug nagsinukliay gyud og bala hinungdan nga parehong nangaangol apan pulos ra sa ilang mga tiil. Daling gidala sa Toledo city hospital ang duha apan gibalhin sa tambalanan sa dakbayan sa Sugbo.

Gisubay pa sa kapulisan kun lisensiyado ang gigamit nga mga armas sa duha samtang gipalawman pa ang imbestigasyon. (BANAT NEWS)