Nasunog atol nga nanihapon
CEBU, Philippines — Gibanabana nga P80 mil ang danyos sa sunog nga nahitabo sa Sitio Tinibgan, Panalipan, Catmon alas 7 pasado sa gabii niadtong Sabado.
Ang building nga usa ka residential nga adunay bakery ginama sa mix materials gipanag-iya ni Dante Colonia.
Matud ni Police Officer 1 Vergel Ortiz, desk officer sa Catmon Police Station, nga nakadawat sila sa maong alarma alas 7:30 sa gabii.
Sumala pa ni Ortiz nga dali nga nakatubag sa alarma ang ilang fire brigade uban sa Carmen Fire Station diin ubos kini sa ilang area of responsibility.
Base sa initial nga pakisusi gikan sa tag-iya nga si Colonia nga nangaon sila sa panihapon dihang nakabantay sila nga adunay kayo sa ilang kisame hinungdan nga dali silang nakatawag og kabomberohan.
Si Fire Officer 1 Kevin Casinto, fire investigator, nitug-an nga faulty electrical wiring ang initial nilang kasayuran nga nakuha apan ipaubos pa sa imbestigasyon ang maong sunog nga giisa nila ngadto sa first alarm. - /GMR) (BANAT NEWS)
- Latest
