Padulong sa Mantayupan nangaangol
CEBU, Philippines — Nagtingkagol sa lock-up jail ang driver sa Fuso Elf trak human kini nibangga sa usa ka tourist van nga padulong sa Mantayupan Falls kagahapon sa alas 8:30 sa buntag sa may Sitio Biaong, Dakit, Barili.
Ang driver sa trak mao si Faustino Aranas, 50, taga Balirong, Dakbayan sa Naga, samtang ang driver sa tourist van mao si Elmar Datu, 25, lumad nga taga Malitbog, Bukidnon. Matud ni Senior Police Officer 1 Jorve Timagos, desk officer sa Barili Police Station, nga gikan sa Dakbayan sa Lapu-Lapu ang van ug pag-abot sa kurbadahon nga bahin sa dalan nilapas sa linya ang Elf hinungdan nga kini nibangga.
Dugang pa ni Timagos nga adunay pipila ka sakay sa van ang gidala sa Barili District Hospital samtang ang uban sa Dakbayan sa Sugbo nagpatambal apan wala’y nagrabehan.
Kasamtangang gitanggong sa lock up jail ang driver nga si Aranas samtang gipaabot pa kung mopasaka ba ang mga biktima og kasong reckless imprudence resulting to physical injury and damage to property. - /GMR) (BANAT NEWS)
- Latest
