Siyudad nagkinahanglan og manglimpyo sa kanal

CEBU, Philippines — Gitugotan sa Cebu City Council ang City Budget Officer nga padugangan og pundo nga P1.4 million gikan sa maintenance sa mga kanal ug flood control account aron maka-hire og dugang mga tawo nga maglangkob sa Quick Response Team.

Kini pinaagi sa usa ka resolusyon nga gipangamahanan ni Konsehal Jerry Guardo nga maoy Chairman sa Committee on Infrastructure.

“WHEREAS, the said amount will be used to augment fund to cover salaries for Job Order personnel for the Quick Response Team who were tasked for the declogging and desilting of drainage for the month of November and December 2017,” tipik sa resolusyon.

Si City Engineer Josefa Ylanan nagpadala og suwat nga  penetsahan og Oktubre 27, 2017 nga nangayo og dugang pundo aron maka-hire og dugang tawo nga makatabang sa pagtubag sa daghang request paglimpyo ug pag-atiman sa problema sa mga kanal sa dakbayan.

Dul-an usa ka gatos ka mga job order employees ang kuhaon aron motrabaho sulod sa 44 ka adlaw nga sweldohan og P340 matag adlaw.

Kahinumduman niadtong Oktubre 24 gi-aprubahan ni Mayor Tomas Osmeña ang proposal ni Konsehal Jerry Guardo nga moumol og QRT sa South ug North district  nga tahasang  manglimpyo sa tanang mga kanal sa dakbayan.

Adunay laing resolusyon niini labot sa maintenance ug flood control project sama sa paghimo og mga kanal diha sa mga barangay, pag-ayo sa nangagubang kanal ug mga manholes sa kadalanan sa siyudad, paghimo og mga takob sa kanal ug manholes ug paghabwa sa mga lapok ug basura sa kanal ug paglimpyo sa kasapaan. Gipaabot nga ugmang adlawa sa regular session kini tukion.

Si Konsehal Jose Daluz III sa Barug Team Rama nangutana  kon asa gyud ang maong mga proyekto ipatuman aron mas sayon ang pag-monitor.

“If this is the quick response team, are they on call? In hiring JOs, it should be a specific job, maintenance work or activity is a regular activity of the city, I don’t think JO should be assigned there, naa na bay specific areas where they were be assigned so that we will know the result after 44 days?” pangutana pang Daluz.

Gitubag kini ni Guardo diin ang Department of Engineering and Public Works maoy moila sa mga proyekto nga kinahanglang trabahuon.

Sa pagkakaron si Guardo miingon nga ang DEPW wala pa makasumitir sa lista kon asa i-implimentar ang mga proyekto.

Si Konsehal Pastor Alcover Jr., misanong usab sa pangutana ni Daluz kay kini nagtuo nga sa pag-submit sa project proposal kinahanglan naa na gyu’y trabahuong proyekto.

Samtang si Konsehal Alvin Arcilla mitabang pagtubag sa mga pangutana sa oposisyon.  “The construction of drainage will be done also upon request of the barangays, so we bring people there to solve the problem,” sigon ni Konsehal Arcilla.

Midugang sab si Arcilla nga gamiton sa JOs ang materyales sa DEPW alang sa maintenance ug flood control projects. - /IBM) (BANAT NEWS)