“Kawatan” gi-shotgun sa guwardiya
CEBU, Philippines — Nalandig sa tambalanan ang usa ka gipasanginlang kawatan human kini napusilan sa guwardiya nga nagbantay sa usa ka hardware nga iyahang gisuwayan og lungkab diha sa Barangay Cogon-Pardo, Dakbayan sa Sugbo niadtong Sabado sa gabii.
Ang giingong napusilan mao si Kim Daryl Ciano, 25, residente sa Sitio All Season sa maong barangay kauban ang giingong kakunsabo niini nga naila lang sa pangalang Robert.
Matud pa sa Pardo Police Station nasakpan sa guwardiya sa maong tindahan si Ciano nga nangawat og mga baligya nga mokantidad lang og P2 mil.
Apan imbes nga motahan o moikyas, gilabay og bato ni Ciano ang guwardiya hinungdan nga gipabuthan kini sa shotgun sa maong guwardiya.
Nakaangkon og samad pinusilan sa buko-buko ang suspek apan nakaikyas ang kauban niini. Gidala sa tambalanan ang suspek ug positibong gitudlo sa guwardiya nga maoy nilungkab sa gibantayan niining establisamento. Pasakaan og kasong pagpangawat ang maong dinakpan. - /IBM) (BANAT NEWS)
- Latest