Dispatser gipusil patay
Sumala pa ni PO1 James Michael Borres sa Consolacion Police Station nga samtang nanawag og pasahero ang biktima kalit kini nga gihunongan og usa ka motorsiklo nga ang nagsakay nagsuot og bonnet ug gipusil kini sa makadaghang higayon, ug naigo sa tuhod, hawak ug laing tulo ka mga samad pinusilan sa iyang buko-buko. Philstar.com/File
CEBU, Philippines — Gipusil patay sa wa pa mailhing mamumuno ang usa ka dispatser samtang nanawag kini og pasahero atbang sa usa ka mall didto sa barangay Pitogo, lungsod sa Consolacion niadtong Sabado sa hapon.
Ang nakalas giila nga si Rhenan Herera, 37, residente sa barangay Lamac, sa maong lungsod.
Sumala pa ni PO1 James Michael Borres sa Consolacion Police Station nga samtang nanawag og pasahero ang biktima kalit kini nga gihunongan og usa ka motorsiklo nga ang nagsakay nagsuot og bonnet ug gipusil kini sa makadaghang higayon, ug naigo sa tuhod, hawak ug laing tulo ka mga samad pinusilan sa iyang buko-buko.
Giingong nakadagan pa ang biktima paingon sa guwardiya sa maong mall aron unta magpatabang apan dali kaayong nipadagan palayo ang mamumuno.
Wala na kini makaabot nga buhi sa tambalanan. Nakaplagan ang tulo ka basiyo sa bala sa kalibre .45 nga bala.
Si Borres miingon nga niadtong petsa 31 sa miaging buwan, adunay mireklamong drayber batok kang Herrera kay gibato siya niini kay nasuko nga piso ra ang iyang gihatag sa pagpanawag niini og pasahero. Apan wala ra mipasaka og kaso ang maong drayber.
Niining pagsuwat sa balita nagpadayon pa ang kapolisan sa palawom sa imbestigasyon. - /IBM) (BANAT NEWS)
- Latest
