4 ka dunay warrant sikop

CEBU, Philippines — Tulo ka tawo sikop pinasikad sa warrant of arrest nga giluwatan sa korte ug gi-served sa kapolisan sa dakbayan sa Carcar ngadto sa mga suspetsado niadtong Biyernes sa hapon.

Si Police Chief Inspector Randy Korret, hepe sa Carcar Police Station miila sa ilang tulo ka dinakpan nga sila si Jaylord Baring, taga Sitio San Roque, Barangay Liburon, Carcar kinsa nag-atubang sa kaso nga act of lasciviousness;  Jonelito Alegarbes, residente sa Barangay Guadalupe, Carcar kinsa nag-atubang sa kaso nga pagpangawat ug  Ronnel Seneres, taga Barangay Bolinawan nag-atubang sa kaso nga malicious mischief.

Sa laing bahin, sa samang adlaw laing warrant of arrest ang gi-served sa kapolisan sa lungsod sa Sibonga ngadto sa usa nila ka detainee kinsa giingong notadong hitman nga si Rochie Carillo, taga Lower Bae sa maong lungsod.

Ang warrant of arrest ni Carillo giluwatan ni Regional Trial Court (RTC) Judge Leopoldo Cañete sa Branch 60 sa lungsod sa Barili sa kasong pagpatay.

Kahinumduman nga niadtong Septiyembre 22 niining tuiga ang kapolisan sa lungsod nag-served sa unang warrant of arrest ni Carillo diha sa Barangay Papan sa maong lungsod diin nakaangkon siya og samad pinusilan sa iyang paa human siya misuway og eskapo sa kapolisan sakay sa iyang Suzuki nga motorsiklo. (BANAT NEWS)