Mga anak sa drug surrenderees nagsaulog sa Children’s Month

CEBU, Philippines — Nisalmot sa ika-25 Children’s Month celebration ang mga anak sa drug surrenderees sa Lungsod sa Compostela nga gipasiugdahan sa kapolisan kagahapon sa buntag.

Pinaagi sa tema nga “Bata: Iligtas sa Droga”, ang kapolisan sa Compostela nga gipangulohan ni Senior Inspector Junafe Vergara nipahigayon og lahi-lahing kalihukan sa paglingaw sa mga bata nga nisalmot sama sa mga duwa, storytelling, pagpanghatag og regalo ug video presentation.

Si Vergara nitug-an nga dili mominos sa 500 ka bata nga nag-edad og 2 hangtud 8-anyos ang  nisalmot sa ilang tulo ka oras nga programa.

Dugang ni Vergara nga usa sa highlight sa maong kalihukan ang ilang 10-minutes video presentation diin nagpakita sa lahi-lahing dili maayong epekto sa ginadili nga drugas sa lawas ug kinabuhi sa usa ka tawo.

“Gi-educate nato ang kabataan kung unsay resulta sa drugas sa tawo. Ato usab gipakita nila nga anaa ang kapolisan nga ilang kasaligan,” matud ni Vergara.

Gisaksihan sab sa mga ginikanan ang maong programa nga nikuyog sa ilang mga anak.

Si Vergara niingon nga atol sa program ila sab gipahinumduman ang mga ginikanan sa ilang responsibilidad sa ilang mga anak ilabi na sa pagbantay niini nga dili mahisalaag og laing dalan.

Dugang pa sa hepe nga gipili nila ang mga barangay nga gilangkuban sa Canamocan, Cogon ug Poblacion diin maoy adunay daghang drug surrenderees sa maong lungsod.

Si Vergara nidugang nga ilang gihatagan og shuttle ang mga bata kauban ang ilang mga ginikanan alang sa hapsay ug wala’y rason nga dili sila moapil sa kalihukan.

Lakip usab sa nitambong sa maong selebrasyon mao si Bise Mayor Josephine Abing, Philippine Information Agency officer Ferliza Contratista, Konsehal Maleen Pepito kinsa chairman sa committee on women and children sa konseho sa lungsod, ug ang mga stakeholders nga nitabang sa kapolisan nga mahimong posible ang maong kalihukan.

“Through this event, I’m looking forward nga ang mga kabataan nato aduna sila’y nakat-onan ug ilang madala in the future aron dili sila mosulod sa mga bisyo sama sa paggamit og drugas. Og unta mamahimo silang ehemplo para sa umaabot na usab nga henerasyon,” matud ni Vergara. (BANAT NEWS)