Lalis sa yuta, uyoan nadunggaban
CEBU, Philippines — Katungod sa yuta ang nahimong rason sa panaglalis nga niresulta sa pagdunggab sa pag-umangkon sa iyang uyoan sa Barangay T. Padilla, Dakbayan sa Sugbo niadtong Biyernes sa buntag.
Ang biktima giila nga si Pederito Capuyan, 43, samtang ang suspek mao si Rodulfo Sanchez Jr., 36, pulos nagpuyo sa maong lugar.
Base sa inisyal nga imbestigasyon ni SPO3 Rommel Bancog sa Cebu City Police Office-Homicide Section nga ang biktima nakig-inom og ilimnong makahubog sa iyang amigo sa ilang dapit dihang niabot ang pag-umangkon niini nga si Sanchez pasado alas 10 sa buntag.
Matud pa nga nakiglalis ang suspek ni Capuyan bahin sa yuta nga gitungtungan sa gipuy-ang balay niini.
Sumala pa ni Bancog nga niinit og maayo ang ilang panaglalis ug niresulta kini sa pagsukmagay.
Dugang pa sa imbestigador nga wala nakabantay ang biktima nga nagbitbit og kutsilyo si Sanchez ug kalit kini niyang gidunggab sa liog ug likod.
Ang mga kainom ni Capuyan ang dali-dali nga nidala niini sa tambalanan samtang ang suspek daling nisibat sa lugar.
Atol sa pagsuwat niining balita, giatiman pa sa Cebu City Medical Center si Capuyan samtang ang kapolisan padayon nga nangita ni Sanchez. (BANAT NEWS)
- Latest
