Liquor, party ban suportado sa CCPO

CEBU, Philippines — Nisuporta ang Cebu City Police Office sa tinguha ni Mayor Tomas Osmeña nga i-ban ang ilimnong makahubog ingon ang parties sulod sa red border line sa rota sa Sinulog Grand Parade sunod tuig.

Si Osmeña pinaagi sa iyang Facebook page nihatag og warning sa mga establisemento nga nahimutang sulod sa red border line sa mapa nga himoon sa Sinulog sa dili pagbaligya og mga ilimnong makahubog gikan alas 6 sa buntag sa adlaw sa selebrasyon hangtud sunod adlaw lakip na sa mga parties daplin sa kadalanan nga magsugod gikan Biyernes.

Si CCPO Director, Senior Superintendent Joel Doria, niingon nga sa pagkakaron wala pa sila’y nadawat nga direktiba apan andam nila kining i-implementar subay sa kamanduan sa kagamhanan sa Siyudad sa Sugbo.

“Support lang tayo. Kung may mga ganoong directives po ay definitely i-implement po natin iyan,” matud ni Doria.

Kabahin sa mga ipahigayong party sa umaabot nga Sinulog, si Doria niawhag sa mga organizers nga mohatag kanila og security ug contingency plan para sa pagseguro sa seguridad sa mga motambong niini.

Si Doria nidugang nga dili na hinuon kini bag-o sanglit usa kini sa ilang unang gikinahanglan sa mga dagkong kalihukan sa Sugbo sama sa mga concerts ug uban pa apan ila kining gipalig-on karon sanglit gipaabot nga daghan ang modagsa nga mga partygoers sa mga after parties sa Sinulog Festival.

Hinuon, niingon si Doria nga aduna gihapon sila’y ipakatag nga kapolisan apan kutob ra kini sa gawas sa mga establisemento nga adunay mga parties sama sa disco.

“We will have to check kung ano ba iyung security nila. We have to secure ang mga taong pupunta doon. Mayroon ba silang medical team, mayroon ba silang in house security in case na magkaroon ng problema like stampede ano ang gagawin nila. So they have to present it to us,” dugang ni Doria.

Usa usab sa giklaro ni Doria nga sa pagkakaron wala’y hulga nga nadawat ang Sugbo sa Sinulog apan gipahugtan sa CCPO ang seguridad ilabi na sa mga pantalan ug mga terminals. (BANAT NEWS)