Garbage fees hayan padak-an

CEBU, Philippines — Nagplano na ang kagamhanan sa Siyudad sa Sugbo nga pangitaon kining mga establisamento nga daghan og malabay nga basura aron sila paninglon sa saktong garbage fees sa syudad.

Matud ni City Mayor Tomas Osmeña nga ang Department of Public Services nakabantay nga adunay mga balay patigayon nga pwerteng daghana og basurang makolekta ang siyudad apan gamay ra ang gibayad nga garbage fee. Apan matud niya aduna say mga dagkong negosyo nga gamay ra og basura samtang adunay mga gagmay nga mga establisamento nga pwerte sang daghana og basura nga ilabay kada adlaw.

“The principle here is that government, as part of government service should collect everybody’s garbage. But if you’re an abnormal producer of garbage and you are in business, then the cost of getting rid of your abnormal garbage because of your business should be part of your doing business,”matud sa mayor.

Ubos sa bag-ong sistema nga giingong ipatuman sa sunod tuig, matud ni  Osmeña mas dako ang pabayran niadtong daghan og basurang ilabay kon ang syudad ang mokolekta, o  ba kaha sila nay mag-hire og private company nga mokolekta sa ilang basura.

Sa mga basura gikan sa balay sa mga residente sa syudad, giklaro sa mayor nga mopadayon og kolekta ang syudad sa mga basura tungod dili ingon ana ka bulto sa basura sa mga balay.

Ubos sa aprobadong P6.29 billion Annual Budget para sa sunod nga tuig, ang syudad nigahin lang og P313 million para sa garbage collection ug disposal ug laing P65 million para sa rental of heavy equipment alang sa garbage disposal. (BANAT NEWS)