Shabu murag door knob gipasok sa kinatawo

CEBU, Philippines — Duha ka babaye ang gidakop human misuway og palusot og ginadiling drugas nga ilang gisulod sa ilang kinatawo kagahapon sa buntag sa Cebu City Jail.

Unang nadakpan si Marlyn Estorgio, 20, taga Kalunasan, nga nakuhaan og gidudahang shabu nga giputos og plastic sulod sa iyang kinatawo.

Sunod nga nadakpan mao si Violeta Bacus, 43, taga-San Nicolas, nga nakuhaan sab og plastic sa iyang kinatawo nga sama kadak-a og door knob, nga di momenus P350 mil ang kantidad.

Silang duha nadakpan ni Jail Officer 1 Maria Geraldine Galsing sa pagsusi sa mga babayeng bisita sa city jail.

Si City Jail Warden Renante Rubio nga nahinabi sa Banat News miingon nga alas 9:30 kagahapon sa buntag miabot si Estorgio sa CCJ ug aron makasulod gisusi ang iyang gidala ug siya mismo.

Gipahubo si Estorgio sa jail guard ug gipalingkod, giiwagan ang kinatawo niini ug didto nakita ni Galsing nga may plastic nga misiwil sa kinatawo niini.

Dihang gipangutana ni Galsing si Estorgio kon unsa ang misiwil, mitubag kini nga intra-uterine device kadto.

Apan wa motoo ang jail guard ug gipakuha niya ni Estorgio ang misiwil ug milugwa sa kinatawo niini ang usa ka plastic nga may sulod nga usa ka gamay ug medium pack nga shabu.

Nakuha sab gikan sa iyang 5-anyos nga anak ang pito ka pinaugang dahon sa tabako nga gibakus sa bata. Gi-release ra hinuon sa jail management ang bata, matud ni Konsehal David Tumulak.

Si Estorgio buot unta mobisita ni Gaspin Castillo nga live-in partner niini nga napriso sa kaso nga nalambigit sa ginadiling drogas.

Paglabay sa tunga sa oras nadakpan sab si Bacus ni Galsing dihang migimaw ang plastic sulod sa kinatawo niini.

Dihang gipakuha ni Galsing ang plastic nasuta nga may sulod pa kini nga gidudahang shabu nga sama kadak-a og door knob.

Ang maong shabu mobalor og di momenus P350 mil.

Si Bacus mobisita unta sa iyang live-in partner nga si Rolando Pulgo nga napriso sab sa kaso nga nalambigit sa ginadiling drogas.

Gidala dayon sila sa Gaudalupe Police Station ug giingong pasakaan og kaso karong Lunes. (BANAT NEWS)