Away sud sa ospital nag-viral

CEBU, Philippines — Nag-viral karon sa social media ang video sa usa ka babayeng pasyente nga nagyawyaw ngadto sa usa ka nars kay wala daw siya hatagi og saktong atensyon sa mga hospital personnel sa maong tambalanan.

Ang maong insidente na-blotter diha sa Balamban Police Station giingong nahitabo sa Cebu Provincial Hospital-Balamban niadto pang Nobiyembre 14.

Si PO1 Andie Mabanta sa Balamban Police Station mibutyag nga gireklamo  sa nurse ang magtiayong Cynthia Quiamco ug ang bana niini nga si Jun Quiamco.

Giila usab pinaagi sa tabang sa mga netizens ang nars nga si Liezel Sewane base sa iyang biography sa Facebook.

Apan matud pa sa usa ka "Fleur Cereño Villarin" nga nagpailang anak sa pasyente diha sa video wala sila tagda bisan sa pagbalik-balik na nila’g duol ngadto sa nars.

 "This is to justify our family's side. First of all, if you have noticed, our mom who was ill and a patient forced herself to go to the nurses' station because we weren't attended even though we have requested a nurse for several times already," sigon ni Villarin ngadto sa mga nagkomento diha sa Facebook post.

Sagolsagol ang mga komento nga naglakip sa pagsaway kanila, apan iyang giklaro nga wala gisagpa sa iyang amahan ang nurse kondili gibira lamang niini ang ID tungod kay mibalibad kini sa pagpakita niini.

Sa nigawas nga viral video, makita lamang ang usa ka parte sa lawas sa taason nga lalaki nga niduol sa lamesa diin naglingkod ang nurse ug daw aduna kini gibuhat ngadto sa nurse (wa makuha sa video) nga niresulta sa pagsiyagit niini ug sa mga tawo nga nakakita, misunod dayon ang pagdanguyngoy og hilak sa babayeng nurse.

Wa gyud maklaro sa video kon nadapatan ba sa maong lalaki ang reklamante. Apan klaro sa video nga nagkatinubagay una ang reklamante ug babayeng hamtong nga pasyente nga aduna pay nakakabit nga dextrose nga gisunod-sunod sa usa ka batan-ong babaye, ug taud-taod naabot ang maong lalaki.

"It was the nurse's ID that my dad grabbed from her and she wasn't slapped or anything," depensa pa ni Villarin.

Giawhag niya ang mga netizens nga dili unta dayon sila hukman base lamang sa ilang nakit-an sa video kay dili kini mao ang kinatibuk-an sa panghitabo.

"Let us all remember that all things happen for a reason and we won't have such negative reactions if we weren't triggered to the point that the patient herself would have to stand just for us to get attended. You don't (know) anything about the real scenario. What you see is just a piece of it so please let us refrain from judging people," dugang pagpasabot ni Villarin sa iyang post.

Samtang usa ka concerned netizen nga si Jon Luzmar Empenado mipahibaw pinaagi sa usa ka post nga aduna nay aksyon nga pagabuhaton ang Philippine Nurses Association (PNA).

Base sa biography sa iyang Facebook account, usa siya ka Public Relations Officer ug Board of Trustee sa PNA.

"And this is to let everyone know, that PNA Cebu Chapter Board of Trustees will be meeting her (Sewane) tomorrow (Sunday) to know the whole truth, for possible assistance and of course to uplift the dignity of our profession because PNA is our MOTHER PROFESSIONAL ORGANIZATION tasked to safeguard the welfare of our nurses, protect the noble image of our profession and advance its good cause," sigon ni Empenado.

Dugang gi-post ni Empenado ang screenshot sa ilang pakigkita ni Sewane pinaagi sa chat. "What happened gave me nightmares," pulong gikan ni Sewane.

Si Empenado usa lamang sa mga concerned netizens nga mipagawas og kabalaka sa maong panghitabo ug miawhag sa publiko nga dili angay trataron sa ingon niana nga paagi ang mga nurse.

Miabot na og kapin 270,000 views ang video ug 1,300 niini ang “angry reactions.”

Dili lang ang maong pasyente ang gikasuk-an sa mga netizens sa maong video. Hasta ang guwardiya nga nakita sa video nga wala’y nahimo pagprotektar sa nurse o pagpakalma sa sitwasyon kay siya nagpasopaso lang ug ayha lang milihok dihang nagkakomosyon na. Sa laing bahin si Provincial Health Office Head Dr. Rene Catan namahayag nga ‘under investigation’ pa ang maong insidente.

“O, mo-investigate ta and naa na man pud toy report si Dra. Dandan atong incident. Di sad ko mo-judge against sa patient. Di sa pud ko mo-judge sa nurse,” sigon ni Catan. (BANAT NEWS)