Anti-drug summit sa Liloan gilusad

CEBU, Philippines — Gilusad sa Lungsod sa Liloan ang Leading Empowered Action Against Drug Summit (LEADS) subay sa ilang anti-illegal drug campaign. Tumong niini ang paghatag og pagtagd sa mga biktima sa drugas ubos sa Operation Second Chance Program ug Sugbo Kontra Droga (SUKOD) nga programa sa Probinsiya sa Sugbo.

Matud ni Mayor Christina Garcia-Frasco nga aron mominus ang problema sa ginadili nga drugas, kooperasyon gikan sa tanang sector, sa gobiyerno ug komunidad ang gikinahanglan.

Adunay dili mominus 2,000 ka drug surrenderees ang Liloan.

Nanghatag og mga pasidungog ug ganti nga kwarta ang Liloan LEADS sa mga best performing nga mga barangay, Barangay Anti-Drug Abuse Councils, surrenderees, eskwelahan, ug mga tinun-an.

Gibutyag ni Frasco nga ang nigradwar sa programa nga Operation Second Chance ang adunay oportunidad nga mopakita sa ilang nagkadaiyang mga talento.

Sukad nilingkod si Frasco sa iyang termino, nipakita na siya og dakung suporta ni Presidente Duterte sa pagpakigbatok sa ginadili nga drugas mao nga gipadayon kini sa iyang buhatan ang maong kampanya.

Nagpasalamat si Frasco sa Liloan LEADS focal team, Cebu Provincial Police Office Director Edgar Alan Okubo, Philippine Drug Enforcement Agency-7 Deputy Regional Director, Atty. Analyn Hernandez, ug sa tanang nitabang atol sa kalihukan aron magmalampuson ang kampanya. (BANAT NEWS)