Grade 9 single mother, niambak sa building

CEBU, Philippines — Milagrong nabuhi ang usa ka katabang human siya niambak sa ikatulong andana sa panimay sa iyang amo diha sa Abores St., Barangay Bulacao, dakbayan sa Talisay niadtong Miyerkules sa alas 6 sa gabii.

Ang 20 anyos nga katabang nga lumad nga taga dakbayan sa Toledo giingong adunay anak apan nitungha gihapon sa grade 9 samtang nag-sideline nga katabang.

Si SPO3 Yvonne Ilustrisimo sa Talisay City Police Station nagkanayon nga ang amo sa babaye ang nipahibawo kanila nga sa miaging mga adlaw nabantayan nilang magul-anon kini gumikan sa problema sa ilang pamilya.

Gisuwayan nila kini pakig-estorya apan sa ilang kahibulong nga kalit lang kini nga niambak sa ikatulong andana paingon sa karsada.

Dali nga gidala sa Talisay City District Hospital ang babaye ug maayo na lang gani kay nakaangkon lang kini og piang sa iyang mga   tiil.

Matud pa ni Ilustrisimo nga gidibdib  sa dalaga ang problema niya sa iyang pamilya ngadto sa ilang lugar. Niabot na nga usa ka tuig siya nga working student. (BANAT NEWS)