Diskwento bisan dili tingklase

CEBU, Philippines — Giawhag sa hunta probinsiyal sa Sugbo ang mga public utility vehicle (PUV) operators nga hatagan og 20 porsiyento nga diskwento ang mga tinun-an bisan sa adlaw nga walay klase.

Kini isip pagtuman sa kamanduan sa Land Transportation Franchising and Regulatory Board (LTFRB).

Si Bokal Raul Bacaltos buot nga hatagan og diskwento ang mga tinun-an gikan sa Lunes hangtud Domingo bisan panahon sa bakasyon ug mga holidays.

Matud ni Bacaltos nga pinaagi niini makabenepisyo dili lang ang mga tinun-an     apan sa ila sab mga ginikanan kinsa makaminus sa ilang gasto.

Apan ang pangulo sa Cebu South Mini-Bus Operators Association (CSMBOA) nga si Julito Flores dili uyon sa maong hangyo sa hunta probinsiyal sanglit ubos na gani daan ang ilang gikolekta nga plitehan ug wala nila tumana ang gitugot nga saktong plitehan.

Hinoon giklaro ni Flores nga aron mahatagan og diskwento ang mga tinun-an kung mosakay sa bus, kinahanglan nga magpakita sila og valid student ID nga magpamatuod nga opisyal sila nga na-enrol sa tunghaan. (BANAT NEWS)