Mga alyado ni Rama mohural sa PDP

CEBU, Philippines — Pipila ka sakop sa Barug Team Rama ug mga barangay kapitan sa Dakbayan sa Sugbo ang mohural sa Partido Demokratiko Pilipino-Lakas ng Bayan (PDP-Laban) ugmang adlawa.

Hinoon dili motambong sa kalihukan ang pangulo sa Barug Team Rama, kanhi mayor Michael Rama, kinsa ginganlan ni Presidente Rodrigo Duterte nga “drug protector” ingon man si Konsehal Pastor Alcover Jr. kinsa kontra sa presidente.

Apan nagpasalamat si Rama nga gipili sa PDP-Laban ang ilang grupo nga maoy kaabin sa PDP-Laban dili ang ilang kaatbang nga Bando Osmeña Pundok Kauswagan (BOPK).

Giklaro sab ni Rama nga wala siyay imbitasyon ug kung aduna pa, andam siya motambong sa kalihukan.

Sumala pa ni Konsehal Raymond Garcia nga bintaha sila nga motapon sa PDP-Laban sanglit dili sama sa Dakbayan sa Lapu-Lapu ug Mandaue ang ilang kaatbang ang motapon sab sa partido.

Gumikan niini hapsay ang Dakbayan sa Sugbo sa eleksiyon sa 2019 sanglit tataw man kung kinsa grupo ang suportahan sa administrasyon ni Duterte.

Samtang si Mayor Tomas Osmeña wala nahulga sa lakang sa ilang kaatbang ug kini niingon nga gigamit lang sa Barug Team Rama ang popularidad ni Duterte aron modaug.

Wala sab siya’y plano nga motapon sa PDP-Laban tungod ni kanhi Senador Bongbong Marcos nga gidapigan sa PDP-Laban.

Samtang wala pay desisyon ang mga mayor sa ikaupat nga distrito sa Lalawigan sa Sugbo nga sakop sa Liberal Party nga motapon sa PDP-Laban.

Matud ni Bokal Celestino “Tining” Martinez III, nga gusto sa ilang grupo nga hisgutan og tarung ang imbitasyon.

Si Martinez nibutyag nga bisan ang mga kapitan sa ilang distrito gusto sab makaseguro kun mamahimo ba makaapil sa partido ilabi na non-partisan ang mga opisyal sa barangay. (BANAT NEWS)