CHR mo-subpoena sa Talisay police

CEBU, Philippines — Mopadala og subpoena ang Commission on Human Rights-7 sa kapolisan sa Dakbayan sa Talisay sulod karong semanaha.

Kini human nidangop sa ahensiya ang pamilya sa namatay nga 22-anyos nga si Janleomar Estudillo alyas Junjun nga taga Sitio Riverside, Lawaan 3 kinsa giingong nakigpinusilay sa kapolisan.

Matud ni Leo Villarino, chief investigator sa CHR-7, nga nipahigayon sila og kinaugalingon nga imbestigasyon sa kamatayon ni Estudillo.

Apan tungod kay nidangop na sa ilang buhatan ang pamilya niini, mopadala sila og subpoena sa Talisay City Police Station may kalabutan sa panghitabo.

Sumala pa ni Villarino nga niduso na sa ila og reklamo ang pamilya ni Estudillo hinungdan nga magpadayon sila sa ilang imbestigasyon.

Dugang ni Villarino nga ila sab unya tan-awon kung kinsa ang mga kauban sa operasyon ug padad-an sab nila og subpoena diin tanang alegasyon ilang susihon.

Samtang gitug-an ni Villarino nga karong Lunes ang schedule sa subpoena ni Chief Inspector Michael Angelo Beltran, hepe sa Station 3 sa Dakbayan sa Mandaue nga mopatim-aw sa ilang buhatan aron mopatin-aw sab may kalabutan sa kamatayon sa managsuong Ompad nga namatay atol sa drug operation sulod sa Cebu International Convention Center. (BANAT NEWS)