Apektado sa landslide gipahimangnoan vs. sakit

CEBU, Philippines — Gisubli sa Provincial Board (PB) ang tambag sa Department of Health (DOH)-7 nga magmatngon ang mga residente sa Boljoon nga apektado sa pagdahili sa yuta sa mga posibleng sakit nga makuha gikan sa hugaw nga tubig diha sa ilang tinubdan sa tubig.

Ang pagdahili sa yuta nahitabo atong Nobiyembre 6, alas 7 sa gabii diin duha ka mga sitio sa Barangay Lower Becerril ang naapektuhan.

Matud sa DOH-7 nga aron makalikay sa mga sakit-sakit, siguraduhon daan sa mga lomulupyo nga limpyo ang tubig pinaagi sa pagpabukal niini usa imnon.

Dugang ini giawhag sa departamento nga kung adunay mabati nga sakit sa panglawas ang mga residente mobisita dayon sa labing duol nga mga health centers aron matambalan.

Ang munisipyo sa Boljoon nagplano nga ideklara ang mga apektado nga mga sitio og danger zone ug pabalhinon sa mas luwas nga dapit.

Dugang sa panghitabo nagpadayon ang LGU sa Boljoon inubanan sa mga hinabang gikan sa Probinsya sa Sugbo ang pagpanglimpyo sa tanang suba nga naigo sa pagdahili sa yuta.

Adunay 45 ka mga pamilya ang naapektuhan sa insidente ug 28 ka mga panimalay ang naguba diin 11 niini ang nagusbat gyud ug 17 ang nadanyos.

Sa pagkakaron, temporaryong namuyo sa mga sheltered centers ang mga naapektohan nga mga      pamilya.

Nihatag og pagkaon, katulganan, planggana, ug kabo ang Department of Social Welfare and Development (DSWD) didto sa mga biktima sa pagdahili. (BANAT NEWS)