Pabrika gireklamo kay baho ug abog
CEBU, Philippines — Mga residente sa Sitio Sombria, Barangay Lawaan, sa Siyudad sa Talisay ang mireklamo batok sa usa ka pabrika sa mga lawog sa hayopan diha sa ilang dapit tungod sa matud pa polusyon.
Si Gary Lapinid, kinsa mirepresentar sa mga residente sa St. Ignatius de Loyola Subdivision ug sa uban pang lugar nga parte sa Sitio Sombria miingon nga nangreklamo sila tungod sa sobra kabaho nga alisbo ug ingon man abog gikan sa pabrika sa lawog (ngan gipugngan una sa Banat News) nga nahimutang kilid sa ilahang mga panimalay.
Usa sa mga residente na ang matud pa namatay kay nasakit kini tungod sa kabaho ug kaabog sa lugar nga giingong gikan sa maong pabrika.
“Kami tanan masakit ani. Bisan pangutan-on pa ninyo ang mga residente, naa gyud mi mga nebulizer ug inhalers tungod makahubak gyud ang kaabog.
Dili lang abog, baho pa gyud,” matud pa ni Lapinid.
Ang operasyon sa maong pabrika nagsugod niadtong tuig 2013. Matud pang Lapinid gikan pa lang sa pagsugod sa operasyon sa maong pabrika nag-antos na sila.
Niadtong adlaw nga Miyerkules nagmartsa-protesta ang mga residente sa maong lugar kauban ang mga madre gikan sa Sitio Sombria paingon didto sa Talisay City Hall aron personal nga moreklamo batok sa maong pabrika.
“Dili mi gusto nga aduna na pu’y mamatay tungod lang ani. Mao nga magkinaunsa man gani, padayonon gyud ni namo. Gusto mi og hustisya para namo nga mga residente,” matud pa ni Lapinid.
Wala pa makuhai sa Banat News sa ilang habig ang gireklamong pabrika. (BANAT NEWS)
- Latest
