Clearing operation sa Marawi gisugdan na

CEBU, Philippines — Gipahibawo ni Armed Forces of the Philippines (AFP) Chief of Staff, General Rey Leonardo Guerrero, nga gisugdan na sa militar ang clearing operation sa Marawi City.

Ilang tinguha nga marekober ang tanang patay nga lawas ingon man sa mga armas ug bala sa siyudad alang sa pagbalik sa mga tawo nga nagpuyo sa maong lugar.

Matud niya nga wala nila gitangtang ang posibilidad nga aduna pay mga sakop sa teroristang ISIS ang mosuway og labang sa ubang dapit sa Kabisay-an. Apan matud ni Guerrero nga andam ang militar ug ila sab seguraduhon nga walay makaipsot nga mga sakop atol sa ilang clearing operations.

Si Guerrero ang nangulo sa ika-16 nga anibersaryo sa AFP Central Command uban sa mga opisyal sa Philippine Navy, Marines ug Air Force kagahapon.

Sa programa nga gipahigayon sa Camp Lapu-Lapu sa Lahug, Siyudad sa Sugbo kagahapon sa buntag, gipahinumduman ni Guerrero ang militar sa operasyon batok sa terorismo sa Kabisay-an sama sa malampuson nga pagsumpo sa grupo sa Abu Sayyaf nga nisuway og atake sa Bohol ug pagkadakop sa mga terorista sa Central Visayas. Gipasalamatan sab ni Guerrero ang mga opisyal sa nagkadaiyang sektor sa gobiyerno sa koordinasyon ngadto sa military hinungdan nga epektibo ang kampanya batok sa terorismo ug malampuson sa pagpatunhay sa kalinaw ug kahapsay sa Sugbo. (BANAT NEWS)