Nadakpan aktibo pa nga komunista
CEBU, Philippines — Gikompirmar sa Armed Forces of the Philippines - Central Command nga usa ka aktibong sakop sa komunistang grupo si Rustico Tan bisan sa katiguwangon niini.
Si Tan unang gikataho nga adunay gigunitan nga dakong posisyon sa New People’s Army, butang nga gilimod sa kabanay niini.
Matud sa tigpamaba sa AFP-CentCom, Col. Medel Aguilar, nga base sa ilang intelligence, nahibaw-an nga adunay grupong gigunitan si Tan sa Probinsiya sa Sugbo.
Gidakop si Tan sa mga operatiba sa Provincial Intelligence Branch niadtong Nobiyembre 9 sa Pasil, Lungsod sa Santander pinasikad sa pipila ka warrant of arrest sa kasong pagpatay.
Nagpanon ang kabanay ni Tan sa Cebu Provincial Police Office niadtong Lunes sa pagpangita sa dinakpan tungod kay nabalaka sila sa panglawas niini sanglit aduna kini sakit nga diabetes.
Nireklamo sila nga gitagoan sa kapolisan ug militar tungod kay gipasa-pasahan sila sa impormasyon sa nahimutangan niini.
“Sila nga ang nagtatago kasi for many years na hinahanap siya hindi naman sila nagsabi na nandoon, that is a serious offense,” matud ni Aguilar.
Sumala pa ni Aguilar nga nihangyo ang kapolisan nga itanggong sa ilang kampo si Tan niadtong adlaw nga gidakop kini.
Gi-turnover si Tan sa kapolisan aron dad-on sa korte sa Bohol nga maoy nag-isyu sa warrant.
Matud ni Aguilar nga human nila gipasa sa polis, wala na silay labot sa maong kaso.
“Wala na kami dyan kasi it is a law enforcement activity undertaken by the PNP,” si Aguilar niingon.
Nunot sa pagkadakop ni Tan, si Aguilar nitataw nga magmalinawon na ang Sugbo ilabi na nga nabayran na ang mga kinabuhi nga giingong gikuha ni Tan. (BANAT NEWS)
- Latest