Tulis gituohang ‘inside job’

CEBU, Philippines — Gidudahang inside job ang pagpanulis sa usa ka establisemento sa Sitio Bacay, Tulay, Lungsod sa Minglanilla niadtong Domingo, alas 2 sa kaadlawon.

Matud sa kapolisan sa Minglanilla nga nakadawat sila og tawag gikan sa kapitan sa barangay, Joe Romulus Laput, kinsa nagpahibalo sa maong insidente.

Giila ang security guard nga si Roger Montebon, taga Sibonga, nga maoy nagbantay sa AAC Lightweight Corporation niadtong orasa.

Matud pa nga si Montebon naglingkod sa gawas sa gate atol nga niabot ang lima ka wala mailhing tawo nga nag-bonnet ug dayon gikuha ang iyang armas, cellphone ug pitaka.

Gidala siya sa duha ka tulisan sulod sa usa ka kwarto samtang ang tulo ka kauban ang nisaka sa ikaduha nga andana ug nikuha sa lima ka flat screen TV monitors nga kantidad og P15 mil.

Human sa pipila ka minutos, dali nga nisakay ang tulo sa multicab van bitbit ang mga kinawat niini apan ang duha sa kauban nibalik og giuli kang Montebon ang iyang armas apan wala nay sulod nga mga bala.

Gitataw sa admin officer sa establisemento nga si Jose Marie Villarin nga aduna’y posibilidad nga inside job ang nahitabo labi na nga suhito ang mga kawatan kung asa gipamutang ang mga gamit. (BANAT NEWS)