Mga produkto iladlad atol sa Garbo sa Lapu-Lapu

CEBU, Philippines — Mga nagkadaiyang produkto sa 30 ka barangay sa dakbayan sa Lapu-Lapu gikatakdang ipangladlad atol sa ipahigayong “Garbo sa Lapu-Lapu” karong umaabot adlaw nga Sabado.

Ang maong mga barangay 11 niini nahimutang sa Isla sa Olango ug 19 niini sa mainland.

Ang Garbo sa Lapu-Lapu kabahin kini sa gihan-ay nga kalihukan sa kagamhanan sa siyudad diin ang mga nag-unang produkto sa kabarangayan sa siyudad nga nahimo nang panginabuhian sa mga residente ang ipangladlad.

Lakip sa gipaabot nga mopasundayag sa ilang nag-una nga produkto nga mga pisi nga ginama sa lanot ug nylon ug uban pa mao ang Barangay Basak nga pangulohan sa ilang kapitan nga si Isabelito Darnayla.

Diha sa Sitio Sudtonggan, Suba-Maslog sa Barangay Basak ang kasagarang mogama og mga pisi.

Ang pagpamuhat og pisi maoy nagsilbi nga panginabuhi sa mga lumolupyo sa Barangay Basak diin ang ilang produktong pisi itumod nila diha sa nagkadaiyang tindahan ug kamerkadohan sa Sugbo nga naglakip na sa Taboan ug Carbon area.

Ang mga pisi nga ginama sa lanot itumod usab kini diha sa mga dagkong tindahan sa mga dakbayan sa Mandaue ug Sugbo ug lakip na ngadto sa nagkalain-laing lalawigan nga naglakip sa Bohol ug Leyte.

Ang Barangay Pajac dili usab kini magpaulahi sa pagladlad unya sa ilang mga produkto nga guitara diin ang mao nilang produkto kasagaran kining ipamaligya diha sa mga tindahan sa Carbon, dakbayan sa Sugbo, mga department store o mall sa Metro Cebu.

Ang Barangay Gun-ob naila usab sa ilang pagpanggama og poso ug bag ug ang Barangay Babag naila sa paggama og nagkadaiyang matang sa pyrotechnic ug firecracker. (BANAT NEWS)