33 ka armas gipresentar sa kapolisan sa dakbayan sa Carcar
CEBU, Philippines — Mga 33 ka armas ang gipresentar sa kapolisan sa dakbayan sa Carcar kagahapon kalabutan sa ilang paghingusog sa kampaniya sa “Loose Firearms ug Oplan Katok” nga gisugdan niadtong Oktubre 2, 2014.
Ang kapolisan sa siyudad pinangulohan sa ilang hepe nga si Police Chief Inspector Randy Korret mipresentar sa 23 ka loose firearms ug 10 ka armas gikan sa pagpahigayon nila og Oplan Katok, diin ang kapolisan mobisita diha sa kabalayan sa mga tawo nga naghupot og armas nga wala na mo-renew sa ilang lisensiya.
Kauban sa kapolisan ang Regional Public Safety Batallion- 7, polis sa barangay uban sa suporta ni Mayor Nicepuro Apura ug mga opisyal.
Ang mga armas nga gipresentar gilangkuban sa mga pistol, riffle, revolver, shotgun, sumpak ug uban pa.
Giawhag ni Korret ang katawhan nga motahan na lang sila sa ilang mga armas ngadto sa ilang mga opisyal aron dili sila maproblema kay basin unya sila mapasakaan og tukma nga kaso ug maoy hinungdan nga sila magtingkagol pa sa prisohan. (BANAT NEWS)
- Latest